ອີງຕາມແຜນພັດທະນາເສດຖະກິດ-ສັງຄົມຂອງແຂວງຫຼວງພະບາງ ປີ 2024: ແຜນການລົງທຶນ 2024, ແຂວງຫຼວງພະບາງ ໄດ້ວາງຄາດໝາຍ ແລະ ດັດຊະນີລວມ ເພື່ອສູ້ຊົນລະດົມທຶນພັດທະນາໃຫ້ໄດ້ກວ່າ 3.796 ຕື້ກີບ ເທົ່າກັບ 22% GDP; ໃນນັ້ນການລົງທຶນຂອງລັດ 87,3 ຕື້ກວ່າກີບ ກວມເອົາ 2,30%; ການຊ່ວຍເຫຼືອດ້ານການພັດທະນາບັນລຸ 265,7 ຕື້ກີບ ກວມເອົາ 7%; ການລົງທຶນຂອງເອກະຊົນພາຍໃນ ແລະ ຕ່າງປະເທດ ຫຼາຍກວ່າ 2.657 ຕື້ກີບ ກວມເອົາ 70% ແລະ ສິນເຊື່ອທະນາຄານ 785,8 ຕື້ກີບ ກວມເອົາ 20,70% ຂອງທຶນລົງທຶນທັງໝົດ.
ສົ່ງເສີມການລົງທຶນຂອງເອກະຊົນໃນຂົງເຂດບູລິມະສິດ ແລະ ອຸດສາຫະກຳຕາມທີ່ໄດ້ກຳນົດໄວ້ໃນກົດໝາຍວ່າດ້ວຍການສົ່ງເສີມການລົງທຶນ ສະບັບເລກທີ 14/ກຈສ, ລົງວັນທີ 17 ພະຈິກ 2016; ແມ່ນສຸມໃສ່ບັນດາໂຄງການພັດທະນາເສດຖະກິດຂອງແຂວງ, ບັນດາໂຄງການມີຄຸນນະພາບ, ການລົງທຶນຖ່າຍທອດເຕັກໂນໂລຊີ, ປະດິດສ້າງໃໝ່ຕິດພັນກັບການຫັນເປັນອຸດສາຫະກຳ ແລະ ທັນສະໄໝ, ເປັນຕົ້ນແມ່ນການລົງທຶນຜະລິດສິນຄ້າທີ່ຈຳເປັນເພື່ອຄວາມຕ້ອງການຂອງຜູ້ບໍລິໂພກ ແລະ ຫຼຸດຜ່ອນການເພິ່ງພາການນຳເຂົ້າ ແລະ ສ້າງວຽກເຮັດງານທຳໃຫ້ແກ່ປະຊາຊົນ. ເປັນຕົ້ນແມ່ນໂຄງການຄໍ້າປະກັນສະບຽງອາຫານ ແລະ ຊຸກຍູ້ການຜະລິດເປັນສິນຄ້າຕາມມາດຖານກະສິກຳສະອາດ, ຊຸກຍູ້ການປູກຝັງ-ລ້ຽງສັດ ຕິດພັນກັບການປຸງແຕ່ງ ເພື່ອສ້າງລະບົບຕ່ອງໂສ້ມູນຄ່າເພີ່ມຂອງຜະລິດຕະພັນທີ່ມີຄຸນນະພາບທີ່ມີຄວາມຫຼາກຫຼາຍ ແລະ ອຸດົມສົມບູນ, ອຸດສາຫະກຳປຸງແຕ່ງສະບຽງອາຫານ, ອຸດສາຫະກຳປຸງແຕ່ງສິນຄ້າບໍລິໂພກ ແລະ. ພັດທະນາຂະແໜງການທ່ອງທ່ຽວທຳມະຊາດ, ວັດທະນະທຳ, ປະຫວັດສາດຕິດພັນກັບຮີດຄອງປະເພນີ, ເປັນມິດກັບສິ່ງແວດລ້ອມ ແລະ ຍືນຍົງ.
ສົ່ງເສີມການລົງທຶນດ້ານພະລັງງານສະອາດ, ການຂຸດຄົ້ນແຮ່ທາດ ແລະ ການປຸງແຕ່ງໃນຂົງເຂດສຳຫຼວດ ແລະ ວາງແຜນ; ລົງທຶນຂະແໜງການບໍລິການ, ທ່ອງທ່ຽວທຳມະຊາດ, ວັດທະນະທຳ ແລະ ສັງຄົມ; ຊຸກຍູ້ການລົງທຶນໃນຂົງເຂດບໍລິການຂົນສົ່ງ ແລະ ພື້ນຖານໂຄງລ່າງຄົມມະນາຄົມ ເພື່ອເຊື່ອມຕໍ່ບັນດາແຂວງ ແລະ ເຊື່ອມໂຍງເຂົ້າກັບພາກພື້ນ ແລະ ໃນໂລກ. ພ້ອມທັງໃຫ້ແຂວງດັ່ງກ່າວເອົາໃຈໃສ່ດຶງດູດການລົງທຶນຢ່າງແຂງແຮງເຂົ້າບັນດາໂຄງການຂະໜາດນ້ອຍ ແລະ ຂະໜາດກາງ, ໂຄງການທີ່ນຳໃຊ້ເຕັກໂນໂລຊີທັນສະໄໝທີ່ຈຳເປັນ ແລະ ເໝາະສົມກັບສະພາບຕົວຈິງ.
ສັງເຄາະ
